الشاعر علي جاسم اللامي
شفت الشارع حيل مضوي
بلا موعد محبوبي تعنه
وجهك كتله يطيب جرحي
يمكن ماخوذ من الجنه
تلكيته بأهلا وشلونك
وصافن هوه ويضحك سنه
احسب نفسك هسه بيتك
واحنه الي صرنه الخطار
نار الشوك متعبه كليبي
بس بجيتك تطفه النار
يالتسوه اسهرلك واتعبلك
ماتوفي بحقك اشعار
كل الضيم الشفته بعمري
يفاركني ويمك ارتاح
بخدودك جوريه مورده
وبشفتك غافي القداح
انت الكمر اليترس عيني
وانت اغلى واجمل مصباح
ومااشبع منك يمدلل
كمت انه ادعي يطول الليل
حتى بحضنك ماأستعجل
وبهداي من اشتم الهيل
ياروح الورده النشوانه
من تباوعلي تهد الحيل
مدلي رموشك بيها اتمرجح
وخصرك خل يغفه اعله جفوفي
وكلي احضانك خل تشبكني
وتصير ضلوعك نفنوفي
مااريد تبعد عن عيني
لودمعك فوك الخد ساح
دونك شلي بروحي وعمري
بلاسله يضيع التفاح